Трамп мис импортига 50 фоизлик божлар қачон жорий этилишини айтди

АҚШ президенти Доналд Трамп томонидан эълон қилинган мис импортига 50 фоизлик божлар 1 августдан кучга киради. «Мен 2025 йилнинг 1 августидан бошлаб мисга 50 фоизлик бож жорий этилишини эълон қиламан, бу миллий хавфсизлик ишончли баҳоланганидан кейин бўлади», деди Трамп ўзининг Truth Social Media ижтимоий тармоғида.

Унинг таъкидлашича, мис яримўтказгичлар, самолётлар, кемалар, ўқ-дорилар, аккумуляторлар, гипертовушли қуроллар ишлаб чиқаришда қўлланади. «Мис Мудофаа вазирлиги томонидан энг кўп ишлатиладиган иккинчи материалдир! Нега бизнинг аҳмоқ (ва уйқусираб ўтирган!) «раҳбарларимиз» бу муҳим саноатни йўқ қилди?» - дея ёзди Оқ уй раҳбари. Унга кўра, янги тарифлар «Байден маъмуриятининг ўйламаган хатти-ҳаракатини ўзгартиради».

Трамп 8 июл куни мис импортига божлар жорий этилишини эълон қилди. Шундан сўнг Ню-Йоркдаги Comex биржасида мис нархи 17 фоизга кўтарилиб, тарихий максимумни янгилади. Bloomberg агентлигининг ёзишича, АҚШ асосан Чили, Канада ва Мексикадан мис импортига жуда боғлиқ. Унда таъкидланишича, ҳозирча тарифлар қандай, қайси маҳсулотларга нисбатан қўлланиши ва етказиб берувчиларга имтиёзлар берилишига аниқлик киритилмаган.

Йел университетидаги The Budget Lab таҳлилий маркази томонидан ўтказилган тадқиқотга кўра, америкалик истеъмолчилар мис импортига жорий қилинган 17,6 фоизлик тарифларнинг салбий оқибатларига дуч келган – у 1934 йилдан бери энг юқори кўрсаткичдир.

Бироқ, Вашингтон божлардан юқори даромадларга ишора қилмоқда: молия вазири Скотт Бессентнинг сўзларига кўра, АҚШ аллақачон 100 миллиард долларга яқин маблағ олган ва йил охирига бориб бу миқдор 300 миллиард долларга етиши мумкин.