Австралия Тайван учун уруш бошланган тақдирда ўзига ҳеч қандай мажбуриятни олмайди

Хитой Тайванга ҳужум қилган тақдирда Австралия АҚШ томонида ҳарбий амалиётларда иштирок этиш мажбуриятини олдиндан ўз зиммасига олмайди. Австралия телерадиокомпаниясига (ABC) мамлакат мудофаа саноати вазири Пэт Конрой: «Австралия қўшинларини можарога жўнатиш тўғрисидаги қарорни ҳукумат зарур бўлганда қабул қилади, олдиндан эмас», деди. У Австралия ўз суверенитетини ҳамма нарсадан устун қўйишини таъкидлади.

Британиянинг Financial Times газетаси 12 июл куни хабар беришича, АҚШ мудофаа вазирининг ҳарбий-сиёсий масалалар бўйича ўринбосари Элбриж Колби сўнгги ойларда АҚШнинг Осиё-Тинч океани минтақасидаги энг муҳим иттифоқчилари бўлмиш Австралия ва Японияни Тайван бўйича можаро авж олган тақдирда ўз режаларини ошкор қилишга чақирган. Худди шу куни Колби X ижтимоий тармоғида Пентагон «президентнинг "Америка ҳаммасидан устун" дастурини амалга оширишга эътибор қаратган»и, бу «иттифоқчиларни мудофаа харажатларини оширишга ва жамоавий мудофаа билан боғлиқ бошқа саъй-ҳаракатларни» ўз ичига олганини ёзди. Ижобий мисол сифатида америкалик мулозим Европа давлатларининг Доналд Трамп талаб қилганидек, мудофаа харажатларини ошириш қарорини келтирди.

Австралия бош вазири Энтони Албанезе бу хабарларга изоҳ беришдан бош тортди. Албанезе яқинда Канберра Тайваннинг статус-квосини, яъни унинг материк Хитойдан де-факто мустақиллигини қўллаб-қувватлашини айтди.

Тайван қисман тан олинган давлат бўлиб, расмий Пекин уни Хитой Халқ Республикаси ҳудудининг бир қисми деб ҳисоблайди. Сўнгги йилларда ХХР орол қирғоқларида бир неча бор кенг кўламли ҳарбий машғулотлар ўтказди, баъзи ҳарбий таҳлилчилар буни оролга бостириб кириш учун репетиция сифатида баҳолади. 2024 йил сентябрида немис ҳарбий кемалари Тайванни материк Хитойдан ажратиб турувчи бўғоздан ўтди, Пекин буни провокация сифатида қабул қилди.