АҚШда Мартин Лютер Кингнинг ўлдирилишига оид тергов ҳужжатлари ошкор этилди

АҚШ президенти Доналд Трамп маъмурияти Мартин Лютер Кингнинг ўлдирилиши бўйича Федерал қидирув бюроси (ФҚБ) терговига оид 230 минг саҳифадан ортиқ файлларни эълон қилди.

АҚШ Миллий разведкаси директори Тулси Габбард баёнотида айтилишича, ФҚБ томонидан тўпланган ва 1977 йилдан бери суд томонидан махфийлаштирилган ҳужжатлар АҚШ Миллий архивлар ва ҳужжатлар бошқармаси веб-сайтида оммага тақдим этилган.

Қайд этилишича, эълон қилинган материаллар орасида Мартин Лютер Кингнинг ўлдирилиши бўйича ФҚБ тергови тафсилотлари, эҳтимолий гумонланувчиларга берилган баҳолар, шунингдек, тергов жараёнини акс эттирувчи хизмат ёзишмалари мавжуд.

Кенжа Мартин Лютер Кинг АҚШ қоратанли фуқаролари ҳуқуқлари ҳаракатининг энг таниқли ва нуфузли раҳбарларидан бири эди. У 1929 йил 15 январда Жоржия штатининг Атланта шаҳрида туғилган ва баптист руҳонийси, шунингдек, афро-америкаликлар ҳуқуқларининг таниқли курашчиси бўлган. Кинг ирқий сегрегацияга зўравонликсиз қаршилик кўрсатиш ва ижтимоий адолат тарафдори эди. 1964 йилда тинчлик бўйича Нобел мукофотига сазовор бўлган.

У 1968 йил 4 апрелда Теннесси штатининг Мемфис шаҳрида афро-америкалик санитария ходимларининг иш ташлашини қўллаб-қувватлаш учун борганида ўлдирилган. Қотилликда бир неча бор қамоқдан қочган, кўплаб судланган жиноятчи Жеймс Эрл Рэй айбланди ва судланди. У 99 йилга қамалди ва 1988 йилда қамоқда вафот этди. Бироқ, шундан кейин ҳам Кингнинг ўлимини махсус хизматлар уюштиргани ҳақида кўплаб фитна назариялари пайдо бўлди.

Ҳужжатлар эълон қилинишидан олдин Мартин Лютер Кингнинг фарзандлари улар билан танишиб чиқди. Уларнинг баёнотида айтилишича, отасининг ўлдирилиши «ўнлаб йиллар давомида жамоатчиликда катта қизиқиш уйғотган». Шу билан бирга, Кинг оиласи барчани ушбу материалларни «ҳамдардлик, вазминлик ва оиланинг қайғусига ҳурмат ҳисси билан» ўрганишга чақирди.

Эслатиб ўтамиз, АҚШ президенти Доналд Трамп собиқ президент Жон Кеннеди, унинг укаси – АҚШ собиқ бош прокурори Роберт Кеннеди ва Мартин Лютер Кингнинг ўлдирилиши билан боғлиқ ҳужжатларни махфийликдан чиқариш тўғрисида сайловолди кампаниясида кўп марта ваъдалар берди. Президентлик лавозимига киришгач, Трамп шу ҳақдаги фармонни имзолади.