Хитойда чикунгуня эпидемиясига қарши курашиш учун улкан каннибал-чивинлар юборилди

Хитойда чикунгуня эпидемиясини тарқатувчи майда чивинларни ейиш учун улкан «филсимон чивинлар» табиатга қўйиб юборилди.

Чивин операциясига Гуандундаги Сун Ятсен университети Чжуншан тиббиёт мактабининг тадқиқот гуруҳи раҳбарлик қилмоқда. Toxorhynchites splendens чивинлари одамларни чақмайди, лекин чикунгуня, денге, зика ва сариқ безгакнинг асосий ташувчилари бўлган Aedes чивинларини овлайди, деб ёзди Bloomberg.

Биргина Фошан шаҳрида уч ҳафта ичида 6 мингдан ортиқ касалланиш ҳолати қайд этилган. Ҳукумат Covid-19 пандемияси билан таниш бўлган усулларни қайта тикламоқда: оммавий ПЗР тестлари, касалланганларни изоляция қилиш ва бутун кварталларни дезинфекция қилиш. Фошанда бошқа восита ҳам қўлланилади: чивин тухумлари ва личинкаларини ейдиган 5 мингдан ортиқ балиқ шаҳар ҳовузлари ва дарёларига қўйиб юборилди. Қўшни Гуанчжоуда расмийлар барча 120 та туман учун хавф харитасини эълон қилди ва кунига икки марта инсектицид сепиш бўйича бир ҳафталик кампанияни бошлади.

Чикунгуня вируси фақат зарарланган урғочи чивин чақиши орқали юқади. Касаллик биринчи марта 1952 йилда Танзанияда аниқланган ва номи кимаконде халқи сўзидан олинган бўлиб, «эгилмоқ» ёки «қийшиқ бўлмоқ» деган маънони англатади - бўғимлардаги кучли оғриқлар туфайли беморларнинг юриши шундай тасвирланади. Вируснинг инкубация даври одатда икки кундан етти кунгача давом этади.

Касаллик тўсатдан бошланади - юқори ҳарорат ва бўғимларда кучли оғриқлар пайдо бўлади, улар шу қадар кучли бўлиши мумкинки, ҳаракатланиш қийинлашади. Кўпинча мушакларда оғриқ, бош оғриғи, тошмалар, кўнгил айниши ва қусиш кузатилади. Вирус камдан-кам ҳолларда ўлимга олиб келишига қарамай, бўғимлардаги оғриқлар касалликнинг ўткир босқичидан кейин ҳафталаб, баъзан ойлаб давом этиши мумкин, бу эса беморнинг ҳаёт сифатини сезиларли даражада пасайтиради. Чикунгуня учун махсус даволаш усули мавжуд эмас. Даволаш симптоматик характерга эга бўлиб, оғриқни камайтириш ва ҳароратни туширишга қаратилган.