Axios: Isroil AQShni Eron bilan urushga qo‘shilishga chaqirmoqda

Isroil so‘nggi 48 soat davomida AQSh prezidenti Donald Tramp ma’muriyatini Eronga qarshi uning yadroviy dasturini yo‘q qilish uchun harbiy harakatlarga qo‘shilishga chaqirmoqda, deb xabar berdi Axios 14 iyun, shanba kuni Isroildagi ikki yuqori martabali manbaga tayanib.

Isroilda Eronning Fordodagi yerosti uran boyitish zavodini yo‘q qilish uchun zarur bo‘lgan bunkerga qarshi bombalari yoki yirik bombardimonchi samolyotlari yo‘q. Axios ta’kidlashicha, Qo‘shma Shtatlar ikkalasiga ham ega va harbiy samolyoti parvozi masofasi ham bunga imkon beradi.

Nashrning ta’kidlashicha, hatto bitta obektni bombardimon qilish orqali Qo‘shma Shtatlar to‘g‘ridan to‘g‘ri urushga tortiladi. Boshqa tomondan, Fordo zavodi ishlashda davom etsa, Isroilning Eron yadro dasturini butunlay yo‘q qilish maqsadiga erishib bo‘lmaydi.

13 iyunga o‘tar kechasi Isroil Erondagi nishonlarga, jumladan Tehrondagi obektlar va yadro markazlariga kuchli zarbalar bera boshladi. Ertasi kuni ham zarbalar davom etdi. Oqibatda Islom inqilobi muhofizlari korpusi qo‘mondoni Husayn Salamiy, Eron Qurolli kuchlari Bosh shtabi boshlig‘i Muhammad Bag‘iriy va boshqa bir qator yuqori martabali generallar, shuningdek, yadroshunos olimlar halok bo‘ldi. Umuman olganda, Isroilning zarbalari natijasida o‘nlab odamlar hayotdan ko‘z yumdi, deya xabar qildi Eron.