Eron Isroilga uchirayotgan raketalar sonini nega kamaytirgani ma’lum bo‘ldi

Eronning raketa zaxiralari kamaymadi, lekin ulardan foydalanish bo‘yicha strategiya o‘zgardi, dedi CNN telekanaliga eronlik manba. Uning qo‘shimcha qilishicha, Isroil bundan «xursand bo‘lmasligi kerak».

Manbaga ko‘ra, Tehron ko‘p sonli raketalarni uchirish o‘rniga muhim harbiy va xavfsizlik nishonlariga nisbatan yuqori aniqlikdagi raketalardan foydalanishga qaror qilgan.

«Eron bunday raketani uchirganida Amerikaning THAAD va Patriot, Isroilning Arrow 3, Arrow 2, «Dovud palahmoni» va «Temir gumbaz» tizimlarini osonlik bilan yengib o‘tgani, oldindan belgilangan nishonga tekkani aniqlandi», dedi manba.

Isroilning 13 iyunda boshlagan harbiy amaliyotiga javoban Eronning ilk hujumlarida Tehron yuzdan ortiq raketa uchirdi, biroq hozir Isroil tomoni bir vaqtning o‘zida o‘ndan kamrog‘i otilganini xabar qilmoqda. Masalan, 21 iyunga o‘tar kechasi bir hujumda beshta raketa qo‘llangan, biroq Ynet yozganidek, ular ballistik edi.

Bir kun avval Isroil Milliy kiberboshqarmasi bosh direktori sobiq o‘rinbosari Rafael Franko so‘nggi kunlarda Eron Isroilga berilgan zarbalar oqibatlari haqida ma’lumot yig‘ish va ularning aniqligini oshirish uchun shaxsiy kuzatuv kameralariga ulanishni boshlaganini aytdi.

Isroil, o‘z navbatida, Erondagi raketalarni saqlash va uchirish joylariga samolyotlar bilan hujum qilmoqda. Yana bir nishon yadroviy inshootlar bo‘lyapti.