Tramp yana YeI tovarlariga bojlarni oshirishni kechiktirdi

Donald Tramp Yevropa Ittifoqi va boshqa ayrim mamlakatlardan import qilinadigan tovarlarga savdo tariflarini oshirishni 1 avgustga ko‘chirish haqidagi farmonni imzolaydi. Bu haqda 7 iyul, dushanba kuni AQSh prezidenti matbuot kotibi Kerolayn Livitt ma’lum qildi. Bu ma’lumotni Reuters agentligiga anonim qolishni istagan Yevropa Ittifoqining yuqori martabali manbasi ham tasdiqladi.

Shu kuni Tramp o‘zining Truth Social ijtimoiy tarmog‘ida Yaponiya, Janubiy Koreya, Malayziya, Qozog‘iston va Tunis uchun 25 foiz, Janubiy Afrika Respublikasi hamda Bosniya va Hersegovina uchun 30 foiz, Indoneziya uchun 32 foiz, Serbiya va Bangladesh uchun 35 foiz, Tailand va Kamboja uchun 36 foiz, Laos hamda Myanma uchun 40 foizlik savdo tariflarini joriy etish to‘g‘risida rasmiy maktublarni chop etdi.

Choralar Qo‘shma Shtatlarning ushbu mamlakatlar bilan bo‘lgan «savdo kamomadi» tufayli joriy etilyapti. Oq uy egasi maktublarda agar ushbu mamlakatlardan biri AQShdan keladigan tovarlarga bojlarni oshirishga qaror qilsa, unga bo‘lgan tarif bir xil foiz punktlari bilan aks etishi haqida ogohlantirdi.

8 iyul kuni Tramp tomonidan aprel oyida e’lon qilingan dunyoning ko‘plab davlatlaridan import bojlarini oshirish bo‘yicha 90 kunlik kechiktirish muddati tugaydi. Yevropa Ittifoqi uchun AQSh prezidenti savdo kelishuviga erishishda 9 iyulgacha muddat belgiladi. Hozirgi vaqtda Yevropa Ittifoqi importining aksariyat qismi 10 foizlik asosiy tarifga bo‘ysunadi. Yevropa avtomobillari uchun 25 foiz, po‘lat va alyuminiy uchun esa 50 foiz yuqori boj to‘lanadi. Tramp agar YeI kelishuvga rozi bo‘lmasa, unga barcha tovarlarga 50 foizlik boj qo‘yilishi bilan tahdid qildi.