Rossiya Qozog‘istonga ketgan fuqarolardan 2 yillik soliqni talab qilmoqda

Qozog‘istonga jo‘nab ketgan va u yerda turib masofadan ishlagan Rossiya fuqarolari iyun oyi boshidan RF Federal soliq xizmati (FNS)dan 2022-2023 yillar uchun shaxsiy daromad solig‘ini (NDFL) to‘liq stavka bo‘yicha to‘lashni talab qiluvchi xatlar ola boshladi. Shu tariqa, ular ikki tomonlama soliqqa tortilishi mumkin, chunki ularning ushbu davrdagi daromadlari Qozog‘istonda 5 foizdan 20 foizgacha bo‘lgan jismoniy shaxslardan olinadigan daromad solig‘iga (IPN) tortilishi kerak. Bu haqda «Vedomosti»ga mijozlari shunday talablarga duch kelgan bir qancha soliq sohasidagi yuristlar ma’lum qildi, deb yozadi nashr.

Gazeta suhbatdoshlariga ko‘ra, Rossiya soliq idoralari masofaviy ish Rossiya hududidan olib borilgan va shuning uchun soliq o‘sha yerda olinishi kerak, deb da’vo qilmoqda. Shu bilan birga, masofaviy ishchilar o‘zlarining soliq deklaratsiyasida Qozog‘istonda IPN to‘laganini ma’lum qilgani hisobga olinmayapti, 1996 yildan boshlab esa ikki tomonlama soliqqa tortishni bartaraf etish to‘g‘risidagi konvensiya mamlakatlar o‘rtasida amal qiladi.

Yuristlarning ta’kidlashicha, muammo asosan eskirgan xalqaro qonunchilik mehnatni zamonaviy tashkil etishning o‘ziga xos xususiyatlarini hisobga olmagani bilan yanada kuchaymoqda. Qozog‘istonda olingan mehnat daromadiga ikki tomonlama soliq solinishi yuzasidan maslahat bo‘yicha so‘rovlar keng tarqalmoqda, dedi advokat Ilya Nazarov «Vedomosti»ga.

FNS gazetaga «ish chet el davlati hududida amalga oshirilgan bo‘lsa-da, bu davrda Rossiya Federatsiyasining soliq rezidenti maqomi saqlanib qolgan», dedi. U holda xodim ish safari haqida ma’lumot berishi kerak. Shu bilan birga, soliq xizmati vakilining so‘zlariga ko‘ra, Rossiya Federatsiyasining soliq rezidenti maqomini saqlab qolish Rossiya avtomatik ravishda ish joyi sifatida tan olinishini anglatmaydi.