Isroilda Netanyahu ishini olib borayotgan bosh prokuror iste’foga chiqarilishi mumkin

Isroil hukumati 4 avgust kuni bir ovozdan bosh prokuror Gali Baharav-Miaraning iste’fosini yoqlab ovoz berdi, u hozir bosh vazir Binyamin Netanyahuga qarshi korrupsiya ishi bo‘yicha sudda ish olib bormoqda, deb yozdi Axios. Ta’kidlanishicha, Isroil tarixida birinchi marta hukumat bosh prokurorni ishdan bo‘shatishni yoqladi.

Netanyahu tergovidan tashqari, Baharav-Miara uning maslahatchilarini Qatar bilan aloqalari haqidagi taxminlarni ham tekshirmoqda. Oliy sud hukumatni bosh prokurorni ishdan bo‘shatish «noo‘rin» ekanligi haqida ogohlantirdi va qaror qabul qilingan taqdirda sud taqiqini e’lon etishga va’da berdi.

Netanyahu poraxo‘rlik, firibgarlik va ishonchni suiiste’mol qilish bo‘yicha uchta alohida ish bo‘yicha sudlanmoqda. U badavlat ishbilarmonlardan 200 ming dollar qiymatdan ortiq sovg‘alar olganlikda va yangiliklarda «yaxshi tasvirlanish» evaziga telekommunikatsiya kompaniyasi egasiga yuzlab million dollarlik imtiyozlar berganlikda ayblanmoqda. Bosh vazir bu ayblovlarni rad etmoqda. Sud jarayoni to‘rt yildan beri davom etmoqda, bunga Netanyahuning ishni bir necha bor cho‘zishga urinishlari sabab bo‘lgan.

Adliya vaziri Yariv Levin qarorning Netanyahuga qarshi sud jarayoni bilan bog‘liqligini rad etdi va hukumat bosh prokuror bilan «qarama-qarshi» munosabatlarda «qizil chiziqqa» yetib borganini aytdi.

Baharav-Miara ovoz berishdan oldin Vazirlar Mahkamasiga yo‘llagan maktubida misli ko‘rilmagan qaror har qanday bo‘lajak hukumatga bosh prokurorni siyosiy sabablarga ko‘ra ishdan bo‘shatish imkonini berishidan ogohlantirdi. Uning iste’fosi Netanyahuga qarshi sud jarayoniga va Vazirlar Mahkamasi a’zolariga nisbatan boshqa jinoiy tergovlarga ta’sir qilishi mumkinligidan ogohlantirdi.