АҚШ Венгрия бош вазири аппарати раҳбарига қарши санкцияларни бекор қилди

АҚШ маъмурияти Венгрия бош вазири аппарати раҳбари Антал Роганни қора рўйхатдан чиқарди. Жо Байден даврида у "Глобал Магнитский қонуни" бўйича коррупцияни рағбатлантиришда айбланган.

Фото: REUTERS

АҚШ ҳукумати Венгрия бош вазири аппарати раҳбари Антал Роганга қарши санкцияларни бекор қилди. Бу ҳақда 15 апрел, сешанба куни АҚШ Давлат департаменти сайтида хабар берилди.

Хабарга кўра, давлат котиби Марко Рубио шахсан Венгрия ташқи ишлар вазири Петер Сийяртога қўнғироқ қилиб, унга «Венгриянинг юқори мартабали амалдори Антал Роган АҚШ Молия вазирлиги қора рўйхатидан чиқарилгани ҳақида маълумот бериб, унинг бу рўйхатда қолиши АҚШ ташқи сиёсати манфаатларига тўғри келмаслигини таъкидлаган».

Роган 2015 йилдан бери Виктор Орбаннинг аппарати бошлиғи бўлиб ишлайди. Байден маъмурияти уни 2025 йилнинг 7 январида, ҳокимият Доналд Трампга ўтишидан бир неча кун олдин санкциялар рўйхатига киритган эди.

Роган коррупцияни рағбатлантиргани учун «глобал Магнитский қонуни» бўйича чекловларга дучор бўлган. Будапешт бу чорага эътироз билдиришини эълон қилган.

#АҚШ #Венгрия