Тўрткўл туманига янги ҳоким тайинланди

Илҳомбой Худайбергенов Тўрткўл тумани ҳокими лавозимига тайинланди. У 2020 йил майидан буён туманга ҳокимлик қилиб келган Рустам Шамуратов ўрнини эгаллади.

Фото: Қорақалпоғистон Республикаси Жўқорғи Кенгеси

Қорақалпоғистон Республикаси Тўрткўл тумани ҳокими алмашди. Бугун туманда маҳаллий кенгашнинг навбатдан ташқари сессияси ўтказилди.

Сессияда Қорақалпоғистон Республикаси Жўқорғи Кенгесининг раиси Аманбай Оринбаев иштирок этган. Сессияда Худайбергенов Илҳомбой Тилавбаевич Тўрткўл тумани ҳокими этиб тайинланган.

Маълум қилинишича, Илҳомбой Худайбергенов меҳнат фаолияти давомида ички ишлар органларида, шунингдек, Тошкент вилояти ҳокимининг ўринбосари каби масъулиятли лавозимларда самарали фаолият олиб борган.

Тўрткўл туманига 2020 йил майидан буён Рустам Шамуратов ҳокимлик қилиб келаётганди. Унинг лавозимдан олиниш сабаби маълум қилинмаган.

#Қорақалпоғистон #Тўрткўл тумани #Илҳомбой Худайбергенов