Беларусда қўлга олинган АҚШ фуқароси Зенкович озод этилди

Лукашенкога қарши фитна уюштиришда айбланган сиёсий маҳбус Юрий Зенкович Беларусда қамоқдан озод этилди, деб хабар берди CNN ва АҚШ давлат котиби Марко Рубио. У 4 йилдан ортиқ қамоқда ўтирди.

Юрий Зенкович Фото: Виктор Толочко / Sputnik / РИА Новости

«Беларусь яна бир ноқонуний қўлга олинган АҚШ фуқаросини озод қилди», — деб ёзди давлат котиби Марко Рубио 30 апрель, чоршанба куни Х ижтимоий тармоғида. У бу ҳолат АҚШ президенти Доналд Трампнинг саъй-ҳаракатлари туфайли содир бўлганини таъкидлаб ўтди.

Американинг CNN телеканали аниқлик киритишича, гап Беларусь мухолифати фаоли, Беларусь ва АҚШ фуқароси Юрий Зенкович ҳақида кетмоқда. «Ҳеч қандай алмашинув йўқ», деди АҚШ махсус вакили Адам Бёлер CNN телеканалида бу борадаги саволга жавобан.

Зенкович 2021 йилда Москвада ҳибсга олиниб, кейин Беларусь пойтахти Минскка олиб кетилган ва у ерда «фитна иши» деб аталадиган ишда – АҚШ томонидан Беларусь ҳукмдори Александр Лукашенкони ағдариб ташлаш ва унинг ўғилларини ўлдиришга қаратилган фитнада иштирок этганликда айбланган. АҚШ Давлат департаменти воқеага алоқадорлигини рад этади.

Беларусда Зенкович 11 йилга қаттиқ тартибли колонияга ҳукм қилинди. Беларусь халқ фронти партияси етакчиси Григорий Костусёв ва сиёсатшунос Александр Федута ҳам 10 йиллик қамоқ жазоси олди. Қамоқхонада саратон касаллигига чалинган Костусёв 2024 йил июль ойи бошида Лукашенко амнистияларидан бирида афв этилган эди. Айни пайтда бир нечта сурункали касалликлардан азият чекаётган Федута ҳамон панжара ортида қолмоқда.

#Беларус #Юрий Зенкович