Мерц: Украина учун қурол масофасига энди ҳеч қандай чеклов йўқ

Германия, Буюк Британия, Франция ва Қўшма Штатлар Украинага етказиб бериладиган қурол-яроғлар масофасига қўйилган чекловларни бекор қилди, деди Германия канцлери Фридрих Мерц 26 май, душанба куни. "Энди Украинага етказиб бериладиган қурол-яроғлар масофасида ҳеч қандай чеклов йўқ – на инглизларда, на французларда, на бизда. Ҳеч қандай чеклов йўқ".

Мерцнинг сўзларига кўра, бу Украина энди, жумладан, Россия ҳудудидаги ҳарбий нишонларга зарба бериш орқали ҳам ўзини ҳимоя қила олади дегани. «Яқин вақтгача, жуда кам истиснолардан ташқари, у буни қила олмаганди. Энди қила олади», деди Германия ҳукумати раҳбари ва бу Украинанинг урушни сифатли олиб бориши учун «ҳал қилувчи аҳамиятга эга» эканлигини таъкидлади.

Мерц Германия Украинани қўллаб-қувватлашда давом этиш учун «қўлидан келган барча ишни қилишини» тасдиқлади. Шунинг учун, деди канцлер, у яқинда Киевга Буюк Британия бош вазири Кир Стармер, Франция президенти Эммануэл Макрон ва Полша бош вазири Доналд Туск билан «кўнгиллилар коалицияси» таркибида ташриф буюрган.