Reuters: G7 АҚШ туфайли Украина бўйича баёнотни эълон қилмайди

ОАВнинг ёзишича, Вашингтонга режалаштирилган коммюнике матнидаги Россияга тегишли ва гўёки Украинадаги урушни тугатиш бўйича музокараларга тўсқинлик қилиши мумкин бўлган айрим иборалар ёқмаган.

Фото: Mark Schiefelbein/AP Photo/picture alliance

Канада ҳозирда мезбонлик қилаётган G7 саммитидан сўнг Украинадаги уруш бўйича «кучли» қўшма баёнот чиқариш режасидан воз кечди. Бунга АҚШнинг қаршилик кўрсатиши сабаб бўлди, деб хабар берди Reuters агентлиги 18 июн, чоршанбага ўтар кечаси Канада ҳукуматидаги манбаларга таяниб.

CBC News ёзишича, Вашингтонга Россияга нисбатан режалаштирилган коммюникедаги айрим иборалар ёқмаган: Оқ уй улар Россия билан Украинадаги урушни тугатиш бўйича кейинги музокараларга тўсқинлик қилишидан хавотирда. Телеканал маълумотларига кўра, саммитга раислик қилаётган Канада бош вазири Марк Карни ўз баёнотида унинг бир қисмини ишлатишни режалаштирган.

G7 давлатлари Украина бўйича якуний баёнот ўрнига, хусусан, Яқин Шарқдаги вазият, сунъий интеллект, миграция ва муҳим минерал ресурслар бўйича яна бир қанча қўшма баёнотлар эълон қилди.

#АҚШ #Украина #G7