Австралия 1,5 йил ичидаги биринчи мунтазам рейсни қабул қилди

Австралиянинг Сидней шаҳри аэропорти 1,5 йил ичидаги биринчи мунтазам йўловчи рейсни қабул қилди. Самолёт Лос-Анжелесдан учиб келган. Бунгача мамлакатда ташқи дунё билан алоқа пандемия сабабли 590 кундан бери йўқ эди.

Австралиянинг Qantas авиакомпанияси самолётда келган йўловчилар карантиндан ўтмаслиги ёки бирор чекловларга амал қилиши шартмаслигини маълум қилган, чунки рейсга коронавирусга қарши тўлиқ эмланганларгина чиқарилган.

“Авиакомпания пандемия вақтида австралияликларни хориждан қайтариш бўйича юзлаб рейсларни амалга оширди, бироқ бу рейс деярли 600 кун ичидаги биринчи мунтазам рейс бўлади”, деб қўшимча қилинган компанияда.

Qantas Group бош директори Алан Жойснинг айтишича, парвозлар режалаштирилгандан барвақт бошланган, чунки австралияликлар эмлаш бўйича миллий дастурда фаол иштирок этишган.

Австралия чегаралари тўлиқ эмланган сайёҳлар учун очилиб, улар барча карантин чекловларидан озод қилинган. 1 ноябрдан авиакомпания Лондон ва Лос-Анжелесдан мунтазам рейсларни амалга оширишни бошлайди. Шунингдек, бир қатор бошқа йўналишларни очиш режалаштирилмоқда.