Бухорода йўлдан ўтаётган аёл экскаватор босиб кетиши оқибатида ҳалок бўлди

Аёл йўлнинг белгиланмаган жойидан кесиб ўтаётган бўлган. Экскаватор ҳайдовчиси уни кўрмасдан, босиб ўтган. Ҳолатга ҳуқуқий баҳо берилиши ва жавобгарликнинг муқаррарлиги таъминланиши билдирилди.

Фото: Видеодан кадр

Ижтимоий тармоқларда Бухоро шаҳрида экскаватор йўлдан ўтаётган аёлни босиб кетгани акс этган видеолавҳа тарқалди. Бухоро вилояти ИИБ матбуот хизмати ҳолат юзасидан расмий маълумот берди.

Маълум қилинишича, ЙТҲ 15 май куни Бухоро шаҳар марказий бозори олдидаги йўлда содир бўлган. Фуқаро Ҳ.И. ўз бошқарувида бўлган экскаваторда Ибн Сино кўчаси бўйлаб ҳаракатланиб бораётган вақтида бозордан чиқиб, йўлни кесиб ўтаётган аёлни кўрмай қолиб, босиб кетган. Оқибатда 1961 йилда туғилган аёл воқеа жойида вафот этган.

Ҳолат юзасидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлишига сабаб бўлиши) билан жиноят иши қўзғатилиб, дастлабки тергов ҳаракатлари олиб борилмоқда. Тергов якунларига кўра ҳолатга ҳуқуқий баҳо берилиши ва жавобгарликнинг муқаррарлиги таъминланиши билдирилди.

#ЙТҲ #Бухоро