Хитой ўзининг кўп марталик ташувчи ракетасини синовдан ўтказди

Hiker турига кирувчи ракета муваффақиятли учирилди ва Ерга юмшоқ қўнишни амалга оширди.

Фото: Sepoch

Хитойнинг Beijing Space Epoch Technology Co (Sepoch) тижорий космик компанияси мамлакатдаги илк кўп марталик фойдаланиладиган Hiker туридаги ракета муваффақиятли учирилгани ва Ерга қайтарилганини эълон қилди, деб ёзмоқда Global Times.

Қайд этилишича, ракетанинг учиш массаси қарийб 57 тоннага тенг, у кислород-метанли двигател билан жиҳозланган, диаметри 4,2 метр ва умумий баландлиги эса 26,8 метрга етадиган корпуси зангламайдиган пўлатдан ишланган.

Синов парвози 125 сонияни ташкил этган, максимал баландлик — 2,5 километр. Шундан кейин ракета Шандун провинцияси соҳиллари яқинидаги махсус денгиз платформасига юмшоқ қўнишни амалга оширган.

Куни кеча SpaceX компаниясининг Starship ракета тизими тўққизинчи синов парвозини муваффақиятсиз якунлаган эди. Кема белгиланган орбитага қадар кўтарилган, аммо маълум вақтдан кейин парвоз баландлигини бошқариш тизими ишдан чиққан. Стартдан 10 дақиқа ўтиб, у билан алоқа узилган. Шунга қарамай, кема тезлаткичи автоматик режимда Австралия шимоли-ғарбига бошқарилувчан юмшоқ қўнишни амалга оширган.

#Хитой #Sepoch