АҚШ Таълим вазирлиги Колумбия университети аккредитациясини бекор қилди

Ню-Йоркдаги Колумбия университети энди «дискриминацияга қарши қонунларни бузганлик» ва «антисемитизмга қарши курашиш учун етарлича ҳаракат қилмаганлик» учун федерал аккредитация стандартларига жавоб бермайди, деди АҚШ Таълим вазирлиги.

Вазирлик ўз баёнотида университет раҳбариятини кампусда яҳудий талабаларни таъқиб қилиш ҳолатларига йўл қўйганликда ва антисемитизм кўринишларига қарши курашиш учун етарли чоралар кўрмаганликда айблади.

АҚШ таълим вазири Линда Макмэннинг айтишича, университет 7 октябрдаги хуружлардан кейин «яҳудий талабаларга нисбатан таъқибларга қасддан эътибор бермаган».

«Бу нафақат ахлоқсизлик, балки ноқонуний», деди Макмэн.

Аккредитация стандартлари бузилгани сабабли университетга аккредитациядан ўтган таълим муассасаси мақомини сақлаб қолиш учун аниқланган муаммоларни тузатиш ва федерал қонунчиликка риоя қилиш муддати берилди.

Аввалроқ, 30 январ куни АҚШ президенти Доналд Трамп антисемитизмга қарши кураш тўғрисидаги фармонни имзолаб, Фаластинни қўллаб-қувватловчи намойишларнинг бошқа иштирокчилари ва чет эллик талабаларни депортация қилишга ваъда берган эди.

Колумбия университетининг Манҳэттендаги асосий кампуси АҚШнинг Исроилни қўллаб-қувватлаши ва Ғазодаги Исроил ҳарбий амалиётлари туфайли юзага келган гуманитар инқирозга қарши норозилик намойишлари марказларидан бирига айланди.

Ўтган йили Фаластин билан бирдамлик намойишлари бутун мамлакат бўйлаб ўнлаб университетларга тарқалди, дарслар бекор қилинди, маъмуриятлар истеъфога чиқди ва намойишчилар қўлга олинди ёки тўхтатилди.