Jizzaxdagi 20 ta maktabda koronavirus aniqlangan

Joriy yilning o‘tgan davri mobaynida Jizzax viloyatida hududida jami 309 nafar fuqaroda koronavirus infeksiyasi aniqlangan bo‘lib, ularning 250 nafari sog‘ayganligi tufayli tibbiy nazoratdan chiqarilgan. Bu haqda viloyat SEO va JSB boshlig‘i o‘rinbosari Minnigul Muhitdinova viloyat hokimligida o‘tkazilgan brifingda ma'lum qildi.

Hozirgi kunda Jizzax viloyatida 59 nafar bemor, shu jumladan, 9 nafar bemor yuqumli kasalliklar shifoxonasida va 50 nafar bemor uy sharoitida tibbiy nazoratga olingan.

Epidemiologik vaziyat og‘ir bo‘lgan hududlardan kelgan va bemorlar bilan muloqotda bo‘lgan jami 6 ming 735 nafar fuqaro tibbiy nazoratga olingan bo‘lib, ulardan 5 ming 677 nafarida tibbiy kuzatuv muddati tugaganligi sababli nazoratdan chiqarilgan.

Hozirgi kunga qadar 20 ta umumta'lim maktabi o‘qituvchi va o‘quvchilarida koronavirus infeksiyasi aniqlanganligi sababli onlayn shakldagi ta'lim tizimiga o‘tkazilgan.  Viloyatda jami 202 ta davlat maktabgacha ta'lim muassasalari mavjud bo‘lib, ularning 182 tasi faoliyat ko‘rsatmoqda. Qolgan MTMlarda ta'mirlash va rekonstruksiya ishlari olib borilmoqda.

Bugungi kunga qadar 32 ming doza AstraZeneca,  84 ming 800 doza ZF-UZ-VAC2001 vaksinasi, 900 doza Sputnik-V vaksinasi olib kelingan. Birinchi bosqichda 46 ming 953 nafar, ikkinchi bosqichda 11 ming 456 nafar fuqaro emlash bilan qamrab olingan. 2020 yil 1 aprelidan boshlab 543 mingdan ziyod PZR tahlili o‘tkazilgan.

Avvalroq, koronavirus tufayli 10 ming 882 nafar maktab o‘quvchisi masofaviy ta'limga o‘tkazilganligi hamda  Jizzax davlat pedagogika institutida 17 may kunidan boshlab  an'anaviy ta'lim shaklida o‘qish boshlanishi xabar berilgan edi.