Polshada hamkasbini muntazam ravishda zaharlashga urinib kelgan farrosh hibsga olindi

U hamkasbining ichimligiga zaharli moddalar qo‘shib kelgan. Shuningdek, mazkur holatdan xabardor bo‘lib, hech qanday chora ko‘rmagan yana bir ishchi qo‘lga olingan.

Foto: Videodan kadr

Polshada hamkasbini tizimli ravishda zaharlashga urinib kelgan farrosh hibsga olindi, deb xabar beradi In-Poland nashri.

Qayd etilishicha, klining kompaniyasining 56 yoshli ishchisi o‘z hamkasbining ichimligiga zaharli modda qo‘shayotgani yashirin kamera yordamida tasvirga olganidan keyin politsiya tomonidan hibsga olingan. Tergov ma’lumotlariga ko‘ra, jinoyatga ishchilar o‘rtasidagi shaxsiy adovat sabab bo‘lgan.

Jabrlanuvchi bir necha oy davomida qorin sohasida kuchli og‘riqlardan aziyat chekkan va avvaliga u buni charchoq bilan bog‘lagan. Ammo ahvoli og‘irlashgach, shifoxonaga murojaat qilgan va unda kimyoviy zaharlanish alomatlari aniqlangan.

«Ishxonada choy va Coca-Cola ta’mi g‘alati tuyulganidan keyin hushyor tortdim. Lekin men hamkasblarim bunga qodir ekaniga ishona olmasdim», — deydi jabrlanuvchi.

Ayblanuvchi 20 yilgacha ozodlikdan mahrum etilishi mumkin. Shuningdek, ma’lumotlarga ko‘ra, kompaniya ishchilaridan yana biri mazkur holatdan boxabar bo‘lgan va jinoyatning oldini olishga urinmagan. Shu bois u ham uch yil muddatda qamalishi mumkin.

#zaharlash #Polsha