Мерц ва Трамп Украина бўйича ҳамкорликни муҳокама қилди

Германия канцлери ва АҚШ президенти Россиянинг Украинадаги ҳарбий тажовузини тўхтатиш учун яқиндан ҳамкорлик қилишга келишиб олди. Бу Фридрих Мерц ва Доналд Трамп ўртасидаги биринчи телефон суҳбати бўлди.

Германиянинг янги канцлери Фридрих Мерц 8 май, пайшанба куни илк бор АҚШ президенти Доналд Трамп билан суҳбатлашди. Суҳбат чоғида Мерц Оқ уй раҳбарини Германияга, Трамп эса ўз навбатида Германия канцлерини Вашингтонга таклиф қилди, деб хабар беради dpa.

Уларнинг ярим соатга яқин давом этган суҳбатининг асосий қисми Украинадаги уруш масаласига бағишланди. Германия ҳукумати матбуот котиби Штефан Корнелиуснинг сўзларига кўра, Германия ва Қўшма Штатлар Россия ҳарбий агрессиясини тўхтатиш учун яқин ҳамкорлик қилишга келишиб олган. Трамп ва Мерц Россия музокаралар учун жой яратишда ўт очишни тўхтатишга рози бўлиши кераклиги ҳақида келишиб олди. АҚШ президенти Европанинг Украинага тинчлик ўрнатишга қаратилган саъй-ҳаракатларини қўллаб-қувватлашни хоҳлашини айтди, деди Корнелиус.

Мерц ва Трамп, шунингдек, мамлакатлар ўртасидаги савдо келишмовчиликларини имкон қадар тезроқ ҳал қилиш зарурлиги ҳақида келишиб олдилар.

Фридрих Мерц аввалроқ АҚШга жорий йилнинг июнь ойида бўлиб ўтадиган G7 ва НАТО саммитлари олдидан ташриф буюриш ниятида эканини айтган эди.

7 май куни Фридрих Мерц Франция президенти Эммануэл Макрон билан Украинадаги вазиятни ҳал қилиш масалаларини муҳокама қилди. Германия канцлерининг сўзларига кўра, урушни «АҚШ томонидан кейинги сиёсий мажбуриятларсиз» тўхтатиб бўлмайди. Мерц европаликлар АҚШ ролини алмаштира олмаслигини таъкидлади.