USAGM махсус маслаҳатчиси «Америка овози»ни «утилизация қилиш»га чақирди

«Америка овози» (Voice of America, VOA) медиакомпанияси «бутунлай утилизация қилиниши ва кейин қайта ишга туширилиши» керак. Бундай фикрни 25 июн, чоршанба куни АҚШ Конгрессининг Халқаро алоқалар бўйича қўмитасида сўзлаган нутқида «Америка овози»ни молиялаштириш учун масъул бўлган АҚШнинг Глобал медиа агентлиги (USAGM) махсус маслаҳатчиси Кэри Лейк маълум қилди.

Унинг AP агентлиги келтирган сўзларига кўра, бу медиакомпания «тагигача чириган» ва «унинг барча қутқарилиши мумкин бўлган қисмлари АҚШ Давлат департаменти назоратига ўтказилиши керак».

Аввалроқ, 20 июн куни «Америка овози» директори Майкл Абрамовиц АҚШнинг Глобал медиа агентлиги медиакорпорацияда ходимларни қисқартиришнинг янги босқичини бошлагани ҳақида хабар берган эди. Ўз навбатида, The New York Times газетасининг аниқлик киритишича, 600 дан ортиқ ходим ишдан бўшатилгани ҳақида хабар олган.

Шу тариқа, ходимлар сони 200 дан кам одамга қисқартирилади — 2025 йил бошидаги ходимлар сонининг еттидан бир қисми. «Америка овози» журналистлари ва техник ходимлари 1 сентябргача ҳақ тўланадиган таътилга жўнатилади.

Кэри Лейк 25 июн куни Конгрессда сўзга чиқиб, АҚШ президенти Доналд Трампнинг, унинг маъмурияти фикрига кўра, нохолис ва «ташвиқот» тарқатувчи оммавий ахборот воситаларини молиялаштиришни «тагигача» қисқартириш ҳақидаги буйруғини эслатди.

Трампнинг ўзи 25 июн куни Truth Social ижтимоий тармоғида шундай деб ёзди: «Нега республикачилар демократларнинг «овози» бўлмиш «Америка овози» (VOA) фаолиятини давом эттиришни хоҳлайди? Бу бутунлай, сўл радикал фалокат — ҳеч бир республикачи унинг омон қолиши учун овоз бермаслиги керак. Унинг ўлдиринг!»

Аввалроқ, Кэри Лейкнинг Конгрессдаги нутқига қарамай, «Америка овози» директори Майкл Абрамовиц дезинформация тарқатаётган журналистлар ҳақида ҳеч нарса билмаслигини таъкидлаган эди. Унга кўра, мухбирлар томонидан йўл қўйилган хатолар тузатилиб, стандартларни бузганлар интизомий жазога тортилади.

7 май куни Кэри Лейк X ижтимоий тармоғида «Америка овози» фаолиятини давом эттириши ва Трамп сиёсатини тўлиқ қўллаб-қувватлайдиган ултраконсерватив One America News Network (OAN) дастурларини трансляция қилишни бошлаши ҳақида ёзган.

Аввалроқ, 3 май куни АҚШнинг Колумбия округи бўйича Федерал апелляция суди АҚШ президенти Доналд Трампнинг «Америка овози»ни ёпиш ҳақидаги фармойишини бекор қилиш тўғрисидаги қарорни бекор қилган эди. Шунга қарамай, суд Трамп маъмуриятига радиостанциянинг «қонуний равишда талаб қилинадиган» эшиттириш даражасини таъминлашни буюрди. Бир кун аввал «Чегара билмас мухбирлар» халқаро инсон ҳуқуқлари ташкилоти АҚШ Адлия вазирлигидан электрон мактуб олгани, унга кўра «Америка овози» ходимлари келаси ҳафтаданоқ ишга киришиши мумкинлиги ҳақида хабар берган эди. Бундан ташқари, «Америка овози»нинг юзлаб ходимлари аккаунти қайта фаоллаштирилгани айтилган.

«Америка овози» 16 март куни, Трамп АҚШнинг хорижий телерадиокомпанияларини молиялаштирадиган USAGM'да кескин қисқартиришни амалга оширишни буюрганидан сўнг, тунда эфирдан узилди. «Америка овози»нинг 1300 дан ортиқ ходими муддатсиз таътилга жўнатилди.