Трамп Россия бўйича «муҳим баёнот» беришини айтди

АҚШ президенти Доналд Трамп Россия-Украина уруши ҳолатини шарҳлар экан, Россиядан ҳафсаласи пир бўлганини айтди.

«Россиядан ҳафсалам пир бўлди, аммо кейинги бир неча ҳафта ичида нима бўлишини кўрамиз», деди Трамп 10 июл куни NBC News телеканалига берган интервюсида.

«Ўйлайманки, душанба куни [14 июл] Россия бўйича муҳим баёнот бераман», деди АҚШ президенти ва батафсилроқ изоҳ беришни истамади.

Трампнинг қўшимча қилишича, у АҚШ Сенатидан Россияга қарши санкцияларни кучайтириш бўйича республикачи сенатор Линдси Грэм ва демократ Ричард Блументал томонидан ишлаб чиқилган қонун лойиҳасини қабул қилишини кутмоқда. Трампнинг сўзларига кўра, ушбу қонун лойиҳаси «президентга ўзи хоҳлаган нарсани қилиш имконини беради».

«Бошқача қилиб айтганда, мен ундан фойдаланишни хоҳлайманми ёки йўқми, ўзим ҳал қиламан. Улар [сенаторлар] жуда жиддий ва ўта қаттиқ санкциялар тўғрисидаги қонун лойиҳасини маъқуллайди, бироқ уни амалга оширишни президент ҳал қилади», деди Трамп.

Доналд Трамп сўнгги кунларда Россия президенти Владимир Путинни бир неча бор танқид қилди. 3 июл куни уларнинг телефон орқали мулоқотидан сўнг, Трамп суҳбатдан «жуда ҳафсаласи пир бўлганини» айтди, чунки у Путин Украинадаги урушни тугатишга тайёр эмаслигига ишонган. 8 июл куни Вазирлар Маҳкамаси йиғилишида сўзлаган Трамп Қўшма Штатлар «Путиннинг кўп аҳмоқона гапларини тинглаяпти», лекин «бундан ҳеч қандай наф бўлмаяпти», деди.

Апрел ойида америкалик сенаторлар Россияга қарши янги санкциялар тўғрисидаги қонун лойиҳасини тақдим этди. Ҳужжат, хусусан, Россия нефти, нефт маҳсулотлари, табиий газ ёки уранни сотиб олувчи мамлакатлардан импорт қилинадиган маҳсулотларга 500 фоиз бож жорий қилинишини назарда тутади. Трамп 8 июл куни қонун лойиҳасини «жуда жиддий» кўриб чиқаётганини айтди.